Cuireadh 'Camino ar an Mheal' ar siúl i gCathair Ard Mhacha Dé Sathairn, lá mór tiomsaithe airgid ar son Aonach Mhacha, ionad Gaeilge agus cultúrtha na cathrach.
Is é atá sa Mheal ná páirc mhór fhada i lár Ard Mhacha agus is ann a cuireadh tús leis an Camino. Shiúil breis agus 100 duine thart ar an Mheal 25 huaire, turas arb ionann é agus siúlóid 25km. I ndiaidh gach ciliméadar, fuair na rannpháirtithe stampa 'Aonach Mhacha’ ina gcárta chun iad a spreagadh le coinneáil orthu ag siúl.
Bhí spiorad láidir pobail le mothú an lá ar fad, le Gaeilgeoirí de gach cumas agus cúlra i láthair, mar aon leis an mhórphobal agus le lucht tacaíochta agus cairde an ionaid.
Bhí an tAonach plódaithe don Tráth na gCeist a reáchtáladh níos moille sa lá, le beár oscailte san ionad é féin chomh maith le neart bia a bhuí le Caifé Mhacha. Is i dTeach Uí Raifeartaigh a cuireadh clabhsúr ar lá spreagúil spleodrach an Camino.
Is féidir tacú le hAonach Mhacha agus leis an obair ríthábhachtach a dhéanann siad go leanúnach ar son phobal Ard Mhacha tríd an leathanach Gofundme s'acu anseo.
