Lá Domhanda na hÉigse atá ann inniu agus chun ceiliúradh a dhéanamh ar an lá speisialta san fhéilire, labhair Meon Eile le file as Ard Mhacha, Seán Ó Farraigh.
Bíonn téamaí difriúla in úsáid ag Seán agus é i mbun pinn. Toisc gur múinteoir Gaelscoile é bíonn sé ag díriú isteach ar ábhair oideachasúla ar nós an Dara Cogadh Domhanda agus Éirí Amach na Cásca. Ar a bharr sin, scríobhann sé faoi neart téamaí eile amhail an grá agus faoi fhadhbanna a bhíonn faoi chaibidil ar an nuacht cosúil le streachailt na dteifeach.
Deir Seán gur rud iontach é go bhfuil an oiread sin ábhar a thiocfadh leat a phlé san fhilíocht agus mar sin nach mbíonn tú srianta. Tugann seo níos mó deiseanna duit a bheith cruthaitheach ar ndóigh.
Seo thíos an dán atá le cloisteáil san fhíseán dar teideal ‘Cuir síos é’ le Seán Ó Farraigh:
Is iontach an gléas é,
thig leat moll mór a dhéanamh leis beag beann ar an suíomh.
bíodh sé sin sa bhaile, ar obair nó fiú ar an drabhlás,
ná bí buartha, bíonn sé i dtólamh ag do thaobh!
Tráth dá raibh, áfach,
ní raibh ceann ag gach neach.
Leis an oiread sin dordáin a chluintear anois,
shílfeá nach mbeadh i do chuideachta ach an dúrud beach!
Athraíodh an saol go deo,
nuair a tháinig na meáin shóisialta chun an tsaoil.
Muna n-úsáideann tú mar is ceart iad,
thiocfadh leat bheith i mbaol!
Meiltear an t-uafás ama
ar aip de chinéal inteacht chuile lá.
Tá an iliomad acu ann chun tú a shásamh,
Fiú má tá tú a dhul sa tóir ar ghrá!
Ag dul in olcas atá sé,
‘s an diabhal ruda i gcónaí i do ghlac.
Ag scrolláil fríd Facebook nó Instagram,
is í an fhadhb ná nach gcluineann tú faic!
Níl ionat ach sclábhaí scáileáin,
á úsáid san oíche is le linn an lae.
A chara, níl sé de dhíobháil ort de shíor,
in ainm Dé, cuir síos é!