Rann na Feirste. Baile beag i nGaeltacht Thír Chonaill agus baile a bhfuil an ceol go smior ann.
Bhí traidisiún an cheoil i gcónaí láidir i Rann na Feirste agus i mbliana tá siad ag ceilúradh na hoidreachta sin agus an bhuíon cheoil ‘An Druma Mór’ ag comóradh 40 bliain ar an fhód.
Ba iad Aodh Ó Dochartaigh agus Mícheál Ó Gallachóir an bheirt fhear a bhí ag comhrá le chéile sa teach tábhairne i Mín na Leice Oíche Fhéile Pádraig 1976 agus iad ag meas gur chóir buíon cheoil dá gcuid féin a bhunadh i Rann na Feirste.
Sna seachtainí a lean, labhair siad lena gcomhghleacaithe fá na smaointe agus thoiligh siad uilig tacú leo. Tionóladh cruinniú i gColáiste Bhríde go gearr ina dhiaidh sin, ina raibh thart fá scór duine i láthair. Moladh ag an chruinniú sin an banna a chur ar bun lom láithreach le bheith ag feidhmiú ar ócáid mhór a bhí ag tarlú i mí an Mheithimh – ceiliúradh Iubhaile Órga na Coláiste.
Cuireadh Éamonn Ó Gallachóir (Mhéidí) agus Antoin Mac Ruairí (Néidí Mhicí) a theagasc na bportanna dóibh ar na fliútanna. Bhí Daniel Ó Gallachóir (Éamonn Mhéidí) ina dhrumadóir i mBuíon Cheoil na Scoile agus is eisean a cuireadh i mbun foghlama na ndrumaí. Bhí seisean sa dá bhuíon mar a tharla sé. Fuarthas Dominic Mac Eiteagain as na Dúchoraidh níos moille le teagasc ar an druma mór.
Is iad seo na baill a bhí páirteach sa bhuíon cheoil ón tús:
Éamonn Ó Gallachóir
Séamus Ó Dochartaigh
Séan Ó Domhnaill (John Anne)
Dónal Ó Domhnaill (Rua)
Aodh Ó Dochartaigh
Éamonn Ó Gallachóir (Mhéidí)
Antoin Mac Ruairí (Neidí Mhicí)
Cathal Mac Grianna (Ghracie)
Seán Mac Gairbheith (Húidí)
Seosamh Mac Grianna (Mhicí Jimmy)
Mícheál Mac Grianna (Ghracie)
Séan Gallachóir (Mhéidí)
Mícheál Ó Gallachóir (Mary Mhicí)
Proinsias Mac Grianna (Mhaighréide)
Pól Ó Searcaigh
Liam Ó Braoináin
Pádraig Óg Ó Duibheannaigh (flag)
Séamus Ó Domhnaill (Jimmy Bán)
Aodh Óg Ó Duibheannaigh
Mícheál Mac Giolla Bhríde (Nancy)
Vincie Shíle Ó Domhnaill
Mairtín Ó Gallachóir (Mhary Mhicí)
Seán Seosaimh Ó Domhnaill
John Chónaill Mac Giolla Bhríde
Pádraig Ó Domhnaill (Patsy Anne)
Ag amharc mar sin ar an fheabhas a tháinig ar an bhuíon seo thar scór bliain agus na torthaí a fuair siad is fíor a rá gur de thairbhe báinistíocht mhaith é a bheith i ríocht. Bhí beirt seinnteoirí fliút mar bhaill ó bunaíodh iad agus bhí siad páirteach i mbannaí ceoil sna caogáidí chomh maith. Ba iad seo Aodh Ó Dochartaigh agus Dónal Rua Ó Domhnaill.
Ghlac siadsan cúram ar an aos óg agus thug siad treoir dóibh fanacht le chéile ag cleachtadh ardchaighdéain ceoil, agus a bheith bródúil as na mór-dhuaiseanna a bronnadh orthu thar na blianta sin. Is cinnte gur trí shaothar na beirte seo a ba chúis lena gcáil.