Tá Oireachtas na Samhna buailte linn, tá áthas san aer, níl sneachta ar an talamh, ach tá réalta sa spéir…
Inniu, Dé Céadaoin 29 Deireadh Fómhair, tá tús á chur le hOireachtas na Samhna i mBéal Feirste, an chéad uair atá an fhéile bhliantúil ar siúl sa chathair ó bhí 1997 ann. Bunaíodh an tOireachtas siar in 1897 chun ardán speisialta a thabhairt don cheol, cultúr agus saol Gaelach. Freastalaíonn Gaeil as gach cearn den tír ar an fhéile bliain i ndiaidh bliana, agus i mbliana, beidh atmaisféar Gaelach glórach le mothú timpeall Bhéal Feirste.
Beidh scoth na n-imeachtaí ar siúl ón lá inniu go dtí an Domhnach agus rud inteacht d’achan uile dhuine: Ócáid Bhronnta na nGradam Cumarsáide anocht ag Halla na Cathrach, na comórtais amhránaíochta agus damhsa ar an tsean-nós, na comórtais lúibíní agus rapcheoil, ceolchoirmeacha in Óstán an Europa agus i Halla Uladh, imeachtaí teaghlaigh, seoltaí leabhair agus tuilleadh lena chois.
Beidh formhór na n-imeachtaí ar siúl in ionad an ICC agus imeachtaí eile ar siúl i Halla na Cathrach, Óstán an Europa, Halla Uladh, Cultúrlann McAdam Ó Fiaich, An Beehive, Halla Whitla agus Cumann Cultúrtha Mhic Reachtain.
Bhuail Meon Eile le Foireann an Oireachtais i mBéal Feirste agus iad ag ullmhú don tseachtain mhór atá amach romhainn!
Is féidir breathnú ar an chlár ina iomláine anseo agus ticéid a cheannach d’imeachtaí ar leith anseo.
