D’fhill lucht leanúna pheil Dhún na nGall ar Pháirc Sheáin Mhic Cumhaill, Bealach Féich, Dé Sathairn seo caite agus foireann sinsir na bhfear ag tabhairt aghaidh ar fhir Chorcaí i mbabhta 2A de Chraobh na hÉireann.
Ba é seo an chéad chluiche a imríodh i bPáirc Mhic Cumhaill, páirc an chontae, ó cuireadh tús le hobair athchóirithe i mí Aibreáin 2025. Idir an dá linn, imríodh cluichí baile na bhfear i bPáirc Uí Dhomhnaill, Leitir Ceanainn, nó i bPáirc an Athar Uí Thiarnaigh, Béal Átha Seanaidh.
I measc na n-athchóirithe bhí athdhromchlú na páirce, tógáil ballaí nua timpeall na dtaobhlínte agus feabhsú ó thaobh draenála de. Chuala Meon Eile ó Mháire Ní Chochláin, Cathaoirleach CLG Dhún na nGall, a labhair linn faoin obair seo agus faoi thábhacht Pháirc Mhic Cumhaill do phobal na peile.
Cé nach raibh an lá le Dún na nGall, ba lá bródúil é don chlub áitiúil ar leo an pháirc, CLG Sheáin Mhic Cumhaill, agus an obair chrua a rinneadh á taispeáint do na sluaite a tháinig chuig an chluiche. Labhair muid le Claire Donnelly, ball den chlub, faoin iarracht a cuireadh isteach roimh an chluiche leis an pháirc a ullmhú agus faoin bhród a bhain leis an lá.
Ghlac Niamh Ní Dhubhgáin, tacaí na foirne, an t-am le labhairt linn faoin ócáid agus bhuail muid isteach chuig an Cool Creamery, siopa caife in aice le Páirc Mhic Cumhaill, le cluinstin ó Maeve Lafferty faoin tionchar a bhíonn ag na laethanta móra seo ar ghnólachtaí áitiúla.
