Eagraíodh ócáid tiomsaithe airgid do Naíscoil an Chreagáin in Ard Mhacha Theas Dé Sathairn ag cúrsa gailf Chnoc na Seamar, nó Cloverhill, ar an Mhullach Bhán.
Chuaigh breis agus 30 foireann amach ar an chúrsa gailf, atá suite faoi scáth Shliabh gCuillinn, chun tacú leis an chúis thábhachtach. Tá an Naíscoil ar an fhód le beagnach 30 bliain anuas agus ag cur go mór le forbairt agus fás na teanga sa cheantar ó shin.
Faigheann an Naíscoil tacaíocht ón Roinn Oideachais ach bíonn sé doiligh go fóill naíscoil iomlán a reáchtáil ó lá go lá, bliain go bliain, leis an maoiniú sin amháin, go háirithe agus na ciorruithe ag dul i bhfeidhm ar scoileanna i rith an ama.
Mar sin de, bíonn coiste na Naíscoile ag brath go mór ar thacaíocht ón phobal agus ó dhaoine áitiúla ar an talamh. Is coiste deonach atá ag an Naíscoil, agus tuismitheoirí ina mbaill de, agus aithníonn siad an géarghá le tuilleadh áiseanna agus acmhainní a chur ar fáil do na páistí agus don fhoireann.
B’iontach an láthair é don ócáid nó tá ráchairt ar chúrsaí gailf in Ard Mhacha Theas agus clú mór ar Cloverhill mar ionad den scoth agus cúrsa a bhfuil radharcanna áille uaidh.
D’fhreastail Meon Eile ar an lá ghalánta ghrianmhar, áit ar labhair muid le hOifigeach Forbartha Gaeilge de chuid Gaelphobal Ard Mhacha Theas, Ceara Ní Choinn, le tuismitheoir ón Naíscoil agus múinteoir ag Gaelscoil Phádraig Naofa i gCrois Mhic Lionnáin, Karla Pilkington, agus le peileadóir le Contae Ard Mhacha, Jarlath Óg Burns.
