Foirgneamh úr Raidió Fáilte oscailte go hoifigiúil

Osclaíodh foirgneamh úr Raidió Fáilte go hoifigiúil Dé hAoine seo caite.

Ard-Mhéara Bhéal Feirste, Deirdre Hargey, a bhí mar aoí speisialta ag an oscailt agus bhailigh os cionn 100 duine san fhoirgneamh nua le ceiliúradh a dhéanamh ar na háiseanna úra raidió.

Foirgneamh ar luach timpeall £1.7 milliún atá ann agus is ó Chomhairle Cathrach Bhéal Feirste, Ciste Infheistíochta na Gaeilge, an Roinn Pobail agus Foras na Gaeilge is mó a tháinig an maoiniú.

Ba ar bhonn neamhdhleathach a bhí Raidió Fáilte ag craoladh go dtí an bhliain 2006, nuair a bronnadh ceadúnas ar an stáisiún pobail Gaeilge a bunaíodh a chéaduair sna 1990í.

Tá cúis mhór bhróid anois ag craoltóirí Raidió Fáilte agus áiseanna iontacha acu do phobal Gaeilge Bhéal Feirste agus ar fud na cruinne.

Is féidir éisteacht le Raidió Fáilte ar 107.1FM i mórcheantar Bhéal Feirste nó ar líne anseo.

Close
Close