Tá na scoileanna ar ais don bhliain úr agus páistí timpeall na tíre ag cur tús le haistear iomlán nua, go háirithe iad siúd atá i ndiaidh tosnú ar an naíscoil. Thug Meon Eile cuairt ar Naíscoil na Caille i gCathair Ard Mhacha an tseachtain seo agus na páistí go léir ag socrú isteach.
Osclaíodh Naíscoil na Caille in 2017 agus é lonnaithe sa ‘Desert Lodge Nursery’, rud a oibríonn go maith dóibh mar is minic a chuireann tuismitheoirí a gcuid páistí ar an Desert Lodge ar dtús agus ansin, le himeacht ama agus tuilleadh eolais acu ar an Ghaelscolaíocht, cinneann siad ar iad a chur chuig an naíscoil béal dorais.
Ina dhiaidh sin, bíonn neart tuismitheoirí ag iarraidh go leanfadh a bpáistí ar aghaidh chuig bunscoil Ghaeilge mar sin de tá ról iontach tábhachtach ag Naíscoil na Caille i bhforbairt an Ghaeloideachais sa chathair.
Tá córas an Ghaeloideachais láidir in Ard Mhacha, le cúpla naíscoil, Bunscoil na mBráithre Críostaí agus Coláiste Chaitríona. Mhínigh Orlagh Uí Cheallaigh, múinteoir i Naíscoil na Caille, go bhfuil méadú ollmhór tagtha ar líon na dtuismitheoirí atá ag iarraidh a gcuid páistí a chur fríd an Ghaeloideachas. Tá rang Orlagh iomlán lán i mbliana agus 16 dhalta ann.
Guíonn Meon Eile gach rath ar na páistí agus ar na daoine óga ar fad agus iad ag cur tús le bliain úrnua ar scoil.