Tá bailiúchán ealaíne leis an ealaíontóir Dermott McQuillan (dmcq) le feiceáil sna Ballaí Bána i gCultúrlann McAdam Ó Fiaich i mBéal Feirste faoi láthair. Agus is leis an taispeántas sin a chuirtear tús leis an fhéilire ealaíne atá beartaithe ag painéal ealaíne an lárionaid don bhliain amach romhainn.
Bhí gailearaí na mBallaí Bána lán nuair a seoladh an taispeántas ar na mallaibh agus bhí dmcq ann le míniú don slua go n-úsáideann sé an iliomad dathanna le saothar gan chruth agus gan foirm a tháirgeadh. Ceann de na téamaí is mó atá le feiceáil ina chuid ealaíon ná tionchar an tsolais agus an teasa, rud a théann i bhfeidhm air agus é ina chónaí sa Spáinn. Dúirt sé le linn an tseolta go raibh a chroí crochta ar na ballaí agus a chuid ealaíne curtha os comhair an phobail aige.
Bhí Meon Eile i láthair agus labhair muid le dmcq féin agus le stiúrthóir feidhmeach na Cultúrlainne, Ciarán Mac Giolla Bhéin.
Beidh an taispeántas le feiceáil sa Chultúrlann go dtí an 21 Feabhra.