Fógraíodh buaiteoirí 'Ardán na gCeoltóirí Óga' de chuid Chomhairle Ealaíon Thuaisceart Éireann don bhliain 2021 ar na mallaibh.
Bronnadh an gradam seo ar sheisear ceoltóirí óga ó na Sé Chontae a bhfuil sárchumas ceoil iontu i seánraí ar leith, ceol traidisiúnta agus ceol clasaiceach san áireamh.
Mar chuid den duais iontach seo beidh an deis ag na ceoltóirí óga a bheith ag obair le Ceolfhoireann Uladh agus cuirfear maoiniú £5,000 ar fáil lena ngairmeacha in earnáil an cheoil a fhorbairt. Ní hamháin sin ach beidh clár meantóireachta ar fáil do na buaiteoirí go léir.
I measc na mbuaiteoirí, tá Jack Warnock; giotáraí, amhránaí agus cumadóir ceoil as Contae Dhoire. Labhair Meon Eile le Jack faoin duais iomráiteach agus faoi cad a chiallaíonn sé da ghairm mar cheoltóir. Tá Jack ag obair ar a chéad albam aonair faoi láthair agus cuideoidh an duais seo go mór leis lena chur i gcrích agus a sheoladh roimh dheireadh na bliana.
Beidh an craoltóir aitheanta Lynette Fay ag obair le Jack mar mheantóir agus, cé go bhfuil aithne mhaith ag an bheirt acu ar a chéile, níor oibrigh siad lena chéile go dtí seo. Tá Jack ag súil go mór le comhairle Lynette a chloisteáil agus níl aon dabht ach go mbeidh rudaí maithe le theacht ón dísreach seo. Is féidir leat súil a choinneáil ar shaothar Jack anseo.
Chomh maith le Jack, bronnadh gradam 'Ardán na gCeoltóirí Óga 2021' ar Rose Connolly, Róisín Donald (ROE), Andrew Irwin, Angus McCal agus Justine Gormley.